BHAGWAN SE SIDHI BAAT

Ganesh utsav ki dhoom Indore: Indore kshetr ke chintaaman ganesh mandir mein ghante-ghadiyaal kam aur mobile phone ki ghantiyaan jyaada baj rahi hain. Aastha ki anokhi tarangon se prerit ye call khud chintaaman ganesh ke liye aa rahe hain, jinke navaachaari bhakton ne bhaagaadaudi ke is daur mein Bhagwan tak apne dil ki baat pahunchaane ke liye mobile phone ka aasaan jariya khoj liya hai. Das divseeya ganeshotsav ke dauraan chintaaman ganesh ka number milna khaasa mushkil hai, kyonki duniyaabhar mein faile bhakt unhein phone karke muraadein maang rahe hain. Bhakton ke Bhagwan ko phone karne ki pratha par tarkavaadi beshak savaal utha sakte hain. Lekin bhaav-bhakti ke is ajab-gajab samvaad ke taar aastha ki dilchasp kahaaniyon se jude hain. Mandir ke pujaari ashok paathak ne bataaya, vaise chintaaman ganesh ko unke bhakt kareeb chaar dashak se chitthiyaan likh rahe hain. Magar sanchaar ke high-tech yug mein varsh 2005 se bhakton ne Bhagwan tak apni muraadein pahunchaane ke liye mobile phone ka sahaara lena shuroo kar diya. Unhonne bataaya ki jab bhi koi vyakti mobile phone par chintaaman ganesh se 'Baat karne ki' ichha jataata hai, vah phone ko seedhe Bhagwan ki moorti ke paas le jaate hain aur un tak bhakt ka sandesh pahuncha dete hain. Paathak bataate hain ki koi 1,200 saal puraane paramaarakaaleen mandir mein viraaje chintaaman ganesh ko phone karne ki anoothi parampara tab shuroo hui, jab Indore se taalluk rakhane vaala ek bhakt Germany mein bas gaya. Yeh bhakt hajaaron meal ke faasale se Bhagwan ko niyamit taur par chitthiyaan likha karta tha. Ek baar usane mandir ke pujaari ko phone kiya. Usane kaha ki ab vah phone ke jariye ganesh tak apna sandesh pahunchaana chaahata hai. Bhakt ki bhaavanaaon ka maan rakhate hue usaki ichha poori ki gayi. Iske baad se aastha ka Yeh ajab-gajab silsila chal pada, jo aaj tak jaari hai. Mandir ke pujaari ne bataaya, aam taur par chintaaman ganesh ko har maheene ausatan 150 bhakt phone karte hain, lekin ganeshotsav mein aapko Bhagwan ka mobile number lagaataar vyast milega. Is dauraan unhein duniyaabhar se kareeb 200 bhakt har roj phone karte hain. Paathak ke mutaabik, ganesh ke bhakt unase kisi antarang mitr ki tarah lambi baat karte hain aur Bhagwan ke saamane apna dil kholkar rakh dete hain. Unhonne bataaya ki is ganeshotsav mein aise bhakton ki taadaad jyaada hai, jo Bhagwan se achhi shiksha aur badhiya pagaar waali naukri dilaane ki duaa maang rahe hain. Un ganesh bhakton ki taadaad bhi kam naheen hai, jo Bhagwan ke saamane apni ya apne sage-sambandhi ki shaadi karaane ki guhaar laga rahe hain.